Ukraina Yuqarı Radasınıñ insan aqları vekâletlisi Lüdmila Denisova Rusiye ombudsmeni Tatyana Moskalkova ve Rusiye prezidenti yanındaki insan aqları şurasınıñ reisi Mihail Fedotovğa muracaat etip, Aqmescit SİZOsında tutulğan «Veciye Kaşka davasınıñ» mabüsi Kazim Ametovğa tibbiy yardım kösterilüvini teminlemege rica etti.
Bu aqta Denisovanıñ Facebookta derc etken muracaatında aytıla.
Ukraina ombudsmeniniñ qayd etkenine köre, böyle muracaatlar oktâbr ayından berli yollana, amma Rusiye tarafı cevap bermey.
«Kazim Ametovnıñ qızı bildirgenine köre, babası nefes alamay, qan basımı yüksek ve büyrekleri ağıra. Amma kerekli tibbiy yardım kösterilmey. Tuvğanları alı eyileşsin dep, bütün kerekli ilâclarnı bermege azır», – dep yazdı Denisova.
«Veciye Kaşka davasınıñ» mabüsleri Kazim Ametov, Asan Çapuh ve Bekir Degermenciniñ advokatları mabüslerniñ sağlıq vaziyeti fenalaşqanını bildirgen edi.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
