Ukraina ombudsmeni Lüdmila Denisova Rusiyede ve işğal etilgen Qırımda tutulğan qırımtatarlarnıñ advokatları Lilâ Gemeci ve Emil Kurbedinovnen körüşti.
Bu aqta ombudsmenniñ matbuat hızmeti haber ete. Denisovanıñ aytqanına köre, kün tertibiniñ esas meselesi – ukrainalı siyasiy mabüslerniñ sağlıq vaziyeti.
«Tofik Abdulgaziyevniñ advokatı Emil Kurbedinovnıñ bildirgenine köre, müvekkili qandalay, pire ve furun böcekleri olğan kamerağa qaytqan soñ Tofikniñ eki yañı tiş yarası peyda oldı. Lilâ Gemeci, Rusiye mahkemeleri «Hizb ut-Tahrir» davalarını baqqanda mahkeme esnasını cep telefonlarına ya da diger cihazlarğa qayd etmege yasaq etip, İnsan aqları ve esas serbestliklerni qoruv şartnamesiniñ «Adaletli mahkeme aqqı» 6-ncı maddesini boza, dep tarif etti», – dep aytıla haberde.
Bundan ğayrı, Denisova «işğalci akimiyetniñ qolunda» olğan qırımtatar qorantalarınıñ içtimaiy-turmuş meselelerini olarnı al etmek içün advokatlarnen muzakere etti.
O, Rusiye ombudsmeni Tatyana Moskalkovağa muracaat etip, «kerekli tutuv şaraitlerini temin etmege ve tolu tibbiy tedqiq keçirip, onıñ neticeleri esasında Ukraina vatandaşı Tofik Abdulgaziyevni tedaviylemege talap etti».
Denisova, Rusiye ve vaqtınca işğal etilgen Qırım apishanelerinde tutulğan Ukraina vatandaşlarınıñ aqlarını bozmağa imkân bermemek içün halqara toplulıq, diplomat ve aq qorçalayıcılarnı mahkeme oturışuvlarında iştirak etmelerine çağırdı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Deñişimni beklegen qırımlılarnıñ ekseriyeti – qırımtatarlar, olar bir sıra davalarnıñ, hususan «Hizb ut-Tahrir», «Tebliğ Cemaatı» davalarınıñ (Rusiyede yasaqlanğan, amma Ukrainada yasağı olmağan teşkilâtlar) mabüsleri ola.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
