Ukraina Yuqarı Radasınıñ insan aqları vekâletlisi Lüdmila Denisova «Kreml mabüsleriniñ» azat etilüvini prioritetli dep adlandırdı. Bu aqta o, Facebookta yanvarniñ 12-nde qayd etilgen Ukrainalı siyasiy mabüs künü munasebetinen yazdı.
«Ukrainanıñ zemaneviy tarihında yanvarniñ 12-si ayrı yer ala, çünki Rusiye akimiyeti işğalci akimiyetke ve Kreml istilâsına qarşı çıqqan ukrainlerni ve qırımtatarlarnı apiske almağa devam ete. Soñki yarım yılda yapqan işimiz sayesinde onlarnen ukrainalı siyasiy mabüs ve cenk esiri Vatanına qayttı. Lâkin Rusiye apishanelerinde ve vaqtınca işğal etilgen topraqlarda yüzlernen Ukraina vatandaşı qala. Er birini azat etüv meselesi menim içün prioritetli ola. Bütün Ukraina vatandaşlarınıñ evge qaytması içün elimden kelgenini yapacam», – dep yazdı Denisova.
2019 senesi sentâbrniñ 7-nde rusiyeliler tutqan 35 ukrainalı Ukrainağa qayttı. Ukrainada çeşit cinayetlerde qabaatlanıp mahküm etilgen 35 Rusiye ve Ukraina vatandaşı Rusiyege teslim etildi.
Tutulğan şahıslar soñki sefer 2019 senesi dekabrniñ 29-nda Donetsk vilâyetiniñ «Mayorsk» keçiş noqtasında deñiştirildi. Umumen almaşuv çerçivesinde Ukrainağa 76 insan teslim etildi: 12 arbiy ve 64 vatandaş.
Dekabrniñ 30-nda Ukraina prezidentiniñ Qırım Muhtar Cumhuriyetindeki temsilciligi qırımlı mabüsler kelecek basamaqta azat etilecek insanlar cedveline kirsetilecek, dep bildirdi.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
