Link açıqlığı

Saatnıñ esas haberi

Denisova bloger Memedeminovnıñ «vaziyeti kritik olğanından» Moskalkovağa muracaat etti


Nariman Memedeminov, 2019 senesi fevralniñ 13-ü
Nariman Memedeminov, 2019 senesi fevralniñ 13-ü

Ukraina Yuqarı Radasınıñ insan aqları vekâletlisi Lüdmila Denisova qırımtatar faali, bloger Nariman Memedeminovnıñ «telükeli hastalığı» tapılğanından «vaziyeti kritik olğanı içün» Rusiye ombudsmeni Tatyana Moskalkovağa muracaat etti. Bu aqta Denisova Facebook saifesinde haber etti.

«İnsan kritik vaziyette buluna, men qasevetlenem. Siyasiy mabüske acele tibbiy yardım kösterilmese, sağlığına zarar ola bile ve aqibeti ağır ola bile. Tatyana Moskalkovadan Ukraina vatandaşına acele ameliyat yapılması içün tedbir almasını rica ettim», – dep yazdı Denisova.

Daa evel haber etilgeni kibi, Memedeminovğa martnıñ 14-ne planlaştırılğan ameliyat yapılmadı.

Advokat Emil Kurbedinovnıñ aytqanına köre, Memedeminovnı eki aydan berli ağrılar raatsızlay ve o, ameliyatqa muhtac.

Advokat diagnoznı aytmadı, amma Memedeminov yaqın künlerde acele ameliyatqa muhtac, çünki «onıñ tedaviylenmesi pek sozuldı», dep qayd etti. Kurbedinov muvekkiliniñ «acele ameliyat olması içün bütün qurulışlarğa muracaat etkenini» bildirdi.

Rusiye kontrolindeki Qırım Yuqarı mahkemesi martnıñ 14-nde Nariman Memedeminovnıñ tevqifini eki ayğa uzattı.

Martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.

Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.

Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.

Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.

XS
SM
MD
LG