Ukraina ombudsmeni Lüdmila Denisova Ukrainadaki AB Missiyasınıñ yolbaşçı muavini Annika Valdemann ile körüşip, silâ ve patlayıcı maddelerni qanunsız saqlağanında qabaatlanğan qırımtatar faali Edem Bekirovnıñ sağlıq vaziyetini muzakere etti. Bu aqta o, Facebookta yazdı.
Ombudsmenniñ subet vaqtında qayd etkenine köre, Bekirov ekimlerniñ yardımına ve kerekli tutuluv şaraitlerine muhtac.
Bundan ğayrı, Denisova ve Valdemann ukrainalı Pavlo Grıbnıñ sağlığını muzakere ettiler. Valdemann «erkekke Kirill Vışinskiyge ekimler kirsetilgende mustaqil ekimler kirecegine ümüt etkenini» bildirdi.
«Körüşüvde yaralanğan üç ukrainalı askerge yardım aqqında da aytıldı: Vasıl Soroka, Andriy Eyder ve Andriy Artemenko. Moskalkovanıñ malümatına köre, Vasıl Soroka ameliyattan evel endi baqıldı, amma ameliyat ne içündir sozula. Saqatlıq telükesi bar, ameliyat sozulacaq vaqıt yoq», – dep yazdı Denisova.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
2017 senesi avgustında Pavlo Ğrıb Beyazrusiyeniñ Gomelinde ğayıp oldı, daa soñra ise Rusiyeniñ Krasnodar SİZOsında tapıldı. Onı terrorizm maddesine istinaden cinayet işlegeninde qabaatlaylar. Ukraina Baş prokuraturası ukrainalınıñ ğayıp oluvınen bağlı tahqiqat açtı.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
