Mahküm etilgen ukrain faali Vladimir Baluhnı Aqmescit SİZOsında köteklep, kamerağa «er şey güzel, sağlığı yerinde» olğanını aytmağa mecbur ettiler. Bunı Ukraina Yuqarı Radasınıñ insan aqları vekâletlisi Lüdmila Denisova haber etti.
«SİZOda olğan qorqaqlar zaten taqatsız qalğan ukrainalını videokamera ögünde oturtıp, er şey güzel, sağlığı yerinde, tutuv şaraitleri mükemmel ve munasebet stabil yahşı olğanını aytmağa zorladılar», – dep yazdı sentâbrniñ 18-nde Facebookta Denisova.
Ukraina ombudsmeni bunı «oyun» dep saya. «Olıp bitkenlerni Vladimir Baluhtan eşitmege» istegenini aytıp, Rusiyeden faalnen körüştirmesini talap ete.
Sentâbrniñ 14-nde Qırımtatar Milliy Meclisiniñ reis muavini Ahtem Çiygoz Vladimir Baluhnı köteklegenler, dep bildirdi. Onıñ aytqanına köre, Aqmescit SİZOsınıñ reberi Sergey Berejnoy mabüsni kameradan çıqartıp, tiz çökmege talap etti. Amma talabı yerine ketirilmegen soñ Baluhnı «küçnen betonğa yatqızıp, ayaq, ciger ve başını urğanlar».
Sentâbrniñ 15-nde Rusiyeniñ cezalarnı yerine ketirüv federal hızmetiniñ Qırım idaresi Baluhnıñ köteklenmesi aqqında malümat doğru olmağanını bildirdi.
Qırımda apiste tutulğan ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. Bir aydan berli bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
İyülniñ 5-nde Rusiye kontrol etken Aqşeyh rayon mahkemesi ukrain faali Vladimir Baluhqa 5 yıl apis cezası ve 10 biñ ruble (4 biñ grivna) para cezasını tayin etti.
FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
