Ukraina ombudsmeni Lüdmila Denisova Aqyarnıñ Rusiye mahkemesiniñ «Ukraina içün casuslıq» yapqanında qabaatlanğan ve azatlığını 1 yılğa sıñırlap, 12 yıl koloniyada qalmasına üküm etilgen pensioner qadın Galina Dovgopolayağa qarşı qararını takbih etti.
«Qayd etem ki, Ukraina vatandaşına qarşı kütleviy haber vastalarınıñ vekilleri olmağan qapalı sahte mahkeme ilk sefer yapıla ve Galina Dovgopolayağa qarşı cinaiy dava sahte olğanını daa bir kere isbatlay. Vaqtınca işğal etilgen Qırımda işğalci akimiyetniñ siyasiy repressiyalarnı devam ettirmesini ve qanunsız areketlerini takbih etem», – dep yazdı Denisova Telegram kanalında.
O, halqara toplulıqnı «qanunsız tutulğan bütün Ukraina vatandaşlarını tez vaqıtta azat ettirmek ve olarğa qarşı terrornı toqtatmağa mecbur etmek içün Rusiye Federatsiyasına qarşı bütün basqı aletlerini qullanmağa» çağırdı.
Rusiye kontrolindeki Aqyar şeer mahkemesi 2021 senesi martnıñ 24-nde «devlet hainliginde» qabaatlanğan pensioner qadınnı koloniyada qalmasına üküm etti. Mahkemeniñ matbuat hızmeti martnıñ 29-nda bildirgenine köre, cinaiy dava qapalı rejimde baqıldı, çünki «davada devlet sırı olğan malümat bar edi».
Fevral ayında berilgen malümatqa köre, mahkeme Dovgopolayanıñ davasını temelden baqıp başladı. Qırımdan Moskvadaki «Lefortovo» SİZOsına avuştırılğan qadın aynı kamerada qalğan diger qadın tarafından bir qaç kere köteklengen soñ başqa kamerağa alındı.
2019 senesi noyabrniñ soñunda Rusiye Federal telükesizlik hızmeti işğal etilgen Aqyarda Ukraina Mudafaa nazirliginiñ istihbaratı içün casuslıqtan şübheli olğan qadın tutuldı, dep bildirgen edi. 2020 senesi devamında sıñırlav tedbiri bir qaç kere uzatılğan edi.
