Qırımtatar Milliy Meclisiniñ reisi Refat Çubarov Ukrayina Prezidenti ofisiniñ yolbaşçısınıñ mesleatçısı Mıhaylo Podolâknıñ Qırımnıñ muhtariyeti aqqındaki sözlerini izaatladı. Bunı "Gromadska radio" haber ete.
Onıñ fikrince, yarımadadaki Rusiyeniñ mevcutlığınıñ artmasınıñ sebebinden biri tamam Qırım muhtariyetiniñ inkişaf etmemesi olğan. Ukrayina Anayasasında köz ögünde tutulğan yarımadanıñ muhtariyeti deñiştirilmelidir, dep saya o.
"Podolâk bey muhtariyetniñ olması artıq devletniñ bütünligi içün telükedir, dep saya. Söz sırası, Ukrayinada, hususan da cenk vaziyetinde böyle fikirler olduqça çoqtır. Böyle yanaşmalarnı añlaymız, çünki misal olaraq, Qırımnı rusiyeliliyer diger topraqlarğa baqqanda oluqça qolay işğal etip oldılar. 2014-cı yıldaki bu vaziyet bir çoq insannı, anda muhtariyet olmasa edi er şeyniñ yahşı olar edi, dep inandıra. Amma Lugansk, Donetsk vilâyetlerinde muhtariyet yoq edi. Demek mesele muhtariyet ile bağlı degil, Ukrayinada umumen nasıl bir devlet siyaseti keçirilgeni ile bağlıdır... Qırımda Rusiye Qara deñiz flotunıñ olmasını da qayd etmelimiz...", - dedi Meclis reisi.
"Yarımadadaki Rusiyeniñ mevcutlığınıñ artmasınıñ sebepleri tamam Qırım muhtariyetiniñ inkaşaf etmemesidir, tamır qırımtatar halqınıñ aqlarına riayet etmemedir, Qırımdaki qavmiy ukrayinlerniñ aqlarına riayet etmemedir, ruslarnıñ qavmiy çoqluğınıñ monopoliyası ve üstünligidir, dep iddia etem", - dep qayd etti Çubarov.
Meclis reisiniñ sözlerniye köre, (Anayasada yazılğan) şimdiki muhtariyetniñ deñiştirilmesi, yani subyektivlik tamır halq tarafından belgileneceginde, bütün qorqularnı yoq ete bilir edi.
Evel Ukrayina Prezidenti ofisi yolbaşçısınıñ mesleatçısı Mıhaylo Poldolâk, yarımada işğalden azat etilgen soñ Qırım muhtariyet statusından marum etile bilecegini farz etken edi. Podolâknıñ fikrince, unitar bir devlet terkibinde muhtariyeteniñ mevcutlığı separatistler içün elverişli şarait yarata eken.
"Añlaşılğanına köre, muhtariyet alğan soñ soqurca kendini diger bölgelerden daa yahşı sayasıñız. Unitar devlet içün bu telükeli yoldır, bu regional seviyede çatışmağa ketken bir yoldır", - dedi o.
Aprelniñ başında Ukrayina Nazirler kabineti Qırım ve Aqyar şeeriniñ İşğalden azat etilüvi ve reintegratsiyası Strategiyasınıñ yañı variantını qabul etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
