Aqmescitniñ Jeleznodorojnıy rayonı boyunca Rusiye Tahqiqat komitetiniñ tahqiqat bölügi qırımtatar şairesi Aliye Kenjaliyevanıñ «Qırım» gazetasında cenkke qarşı şiirlerniñ derc etilmesi boyunca tahqiqattan evelki teşkerüv materiallarında cinayet alâmetlerini tapmadı. Bunı tahqiqat bölügi rehberiniñ muavini Tagir Magomedov Kenjaliyevanıñ yazılı şekildeki talabına bergen cevabında bildirdi.
Magomedovnıñ bildirgenine köre, teşkerüv «cemiyetke açıqtan ürmetsizlik ifade etken askeriy şan – sovet halqınıñ 1941-1945 senelerindeki Ulu Vatan cenkinde Ğalebe künü aqqında malümatnı tarqatuv vaqiası boyunca» keçirile edi. Bunıñ kibi areketler Rusiye Cinayet kodeksiniñ 354.1 maddesiniñ 3-nci qısmına uyğun keleler.
Cinayet aqqında malümatnı İçki işler nazirliginiñ (İİN) Aqmescit boyunca idaresiniñ hadimleri bildirdi.
Bildirilgenine köre, rayon tahqiqat bölügi teşkerüv materiallarını Aqmescitniñ Rusiyege tabi prokuraturasına yolladı. O, polis hadimleri tarafından alınğan cinayet aqqında haberdar etmek qararınıñ qanunğa uyğun olğanını ya da olmağanını teşkermek kerek.
Mevzuğa dair: «Ölüm – bayram içün sebep degil». Cenkke qarşı şiirler içün qırımtatar qızına qarşı cinaiy iş açıla bile
Aliye Kenjaliyeva Qırım.Aqiqatqa, 2018 senesi mayısında «Qırım» gazetasında derc etilgen şiiri boyunca tahqiqattan evelki teşkerüvniñ ne maqsatnen yapılğanını añlamağanını bildirdi.
Aliye Kenjaliyeva: «Bir taraftan men er şeyniñ bitkenine quvanam. Diger taraftan ise canım ağıra. Teşkerüvniñ maqsadı maña tazyiq etmek olsa, bu, can ağırtıcı şeydir, lâkin, belki de, bu adiy bir hata edi. Ekinci variant olğanına, ve kelecekte men sevgen işimnen raat-raat oğraşa bilecegime ümüt eteyik», – dedi.
İyün 27-de Rusiye İİNniñ Qırım boyunca idaresiniñ cinayetçiler qıdıruv şubesiniñ tahqiqatçısı Kenjaliyevağa, 2018 senesi mayıs 9-da «Qırım» gazetasında derc etilgen cenkke qarşı şiirleri içün Rusiye Cinayet kodeksiniñ 354.1 maddesiniñ 3-nci qısmı (natsizmniñ aqlavı) boyunca tahqiqattan evelki teşkerüv keçirilgenini bildirdi.
