Kursk vilâyetinde Rusiye arbiyleri esirlikke tüşken doquz ukrayinalını öldürdi, dep bildire Deepstate ukrayin tahqiqat leyhası.
Talilcilerniñ malümatına köre, bu, oktâbrniñ 10-nda Yeşil Yol qasabası yanında oldı. Leyha ukrayin arbiylerine atıf etip, öldürüv yerinden alınğan resimlerni de derc ete.
Ukrayina arbiyleri, leyhağa köre, cebe arqasında olğanlarını tüşüne ediler, ve Rusiye askerleriniñ kelmesini beklemey ediler. Lâkin olar olarğa ateş açtılar. Ukrayinlerniñ silâsı bitken soñ, olar esirlikke teslim oldılar. Ruslar olarnı silâsızlandırıp, soyunmağa emir ettiler ve atıp öldürdiler, dep iddia etile. Deepstate derc etken fotoresimlerde insanlarnı çırılçıplaq yerde körmek mümkün.
Ukrayina insan aqları vekâletlisi Dmıtro Lubinets Rusiye arbiyleriniñ areketlerini cenk esirlerine munasebet boyunca Jeneva konventsiyasınıñ qaba bozuluvı dep adladı, Rusiyeni ise - "cenkniñ bütün qaidelerini ve adetlerini bozğan terrorist memleket". O, BMT ve Halqara Qızıl Haç Komitetine muracaat etip, bu vaqianı tahqiq etmesini ve oña qıymet kesmesini rica etti.
Halqara gumanitar uquqqa köre, esirlerni ve teslim olğan askerlerni öldürmek arbiy cinayet sayıla.
Rusiye tarafı esirlerniñ öldürüvi aqqında haberni izaatlamadı.
Muarririyet malümatnı tasdıqlap olamay.
Oktâbrniñ 2-nde Ukrayina Baş prokuraturası Donetsk vilâyetinde 16 ukrayinalı esirniñ Rusiye askerleri tarafından öldürilmesini teşkermege başladı. Umumen, Ukrayina uquq qoruyıcı organları Rusiye askerleri tarafından eñ azından 93 ukrainalı esirniñ öldürüvi aqqında malümatqa saip.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
