Kyiv şeeriniñ yigirmiden ziyade mektepniñ talebeleri fleşmobda iştirak etti, onıñ çerçivesinde balalar, Qırım yanında zapt etilgen ukrain deñizcilerge mektüp ve resimlerni azırladı.
Bu aqta dekabr 17-sinde öz Facebook saifesinde Ukraina halq mebusı Dmitriy Belotserkovets yazdı.
Onıñ sözlerine köre, biñden ziyade resim ve mektüpler azırlanıldı.
“Metinlerden, talebeler, bu vaqianı ne qadar yaqın ve teren sezgeni körüne. Ümüt etem, bu mektüp ve resimler ukrain deñizcilerine küç ve ilham berir. Bu fleşmobqa bütün memleketimiz qol tutsın ve bütün Ukraina talebeleri ukrain mabüslerini yazıp başlağanını ister edik”, - dedi mebus.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Keric burhanı süretlerde
Keric burhanı süretlerde
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
