Keriç köprüniñ deñev demiryol areketini bu sene avgust-sentâbr aylarında başlatmağa planlaştıralar, dep bildirdi cumaaqşamı künü, aprelniñ 18-nde, Qırımnıñ Rusiye ükümeti reisiniñ muavini Mihail Seleznöv «Yalta iqtisadiyat forumında» çıqışta bulunıp.
«Köpürniñ Taman tarafından ve Qırım tarafından birinci töşemesi endi bar… Küçük bir sır aytayım, avgust-sentâbrde Keriç köprüniñ bütün esnaslarını tertiplemek içün ilk areket (demiryol areketi – QA) başlatılacaq. Seferler, planlaştırılğanı kibi, dekabrde başlaycaq», – dep bildira Seleznövniñ aytqanlarını TASS.
Bundan evel Rusiye prezidenti Vladimir Putin 2019 senesi Keriç köpründeki demiryol areketi başlaycaq, dep bildirgen edi.
«Qırım demiryolu» yolcularğa hızmet idaresiniñ yolbaşçısı Vladimir Rezniçenko qurulğan Keriç köpründe ilk yolcu treni dekabrniñ 8-nde sefer yapacaq, dep bildirgen edi. Yarımadağa ketken trenlerniñ biletleri sentâbrden başlap satılacaqtır.
«Qırım demiryolu» Rusiye müdiri Aleksey Gladilin Keriç köprüniñ demiryol qısmı açılğan soñ andan qomşu Rusiyeniñ 11 şeerinden trenler keçecek, dep ilân etti.
Keriç boğazındaki köpürniñ maşina qısmı yengil maşinalarnıñ keçişine bu sene mayıs ayında açıldı. Oktâbrniñ 1-nde yük maşinalarınıñ areketi açıldı. Köpürniñ demiryol qısmı daa qurulmadı.
Ukraina prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
Avropa Birligi ve ABD Rusiye ve işğal altındaki Qırım arasındaki Keriç köprüniñ qısmen açılışını takbih etti. Ukraina tarafı 2014 senesi Qırım ilhaq etilgen soñ Rusiye ile köpür qurucılığı añlaşmasından çıqtı.
