Kramatorsknıñ demiryol vokzalına kerçekleştirilgen raketa darbesi vaqtında anda aman-aman dört biñ vatandaş bar edi, çoqusı qadın ve balalar. Bu aqta aprelniñ 8-nde Ukraina baş prokurorınıñ ofisi bildirdi.
Baş prokurornıñ ofisi «cenk qanunları ve adetlerini bozuv» maddesine istinaden cinaiy dava açıldı, dep hatırlattı.
«Tahqiqatnıñ malümatına köre, 2022 senesi aprelniñ 8-nde Rusiye Federatsiyasınıñ silâlı quvetleri halqara gumanitar uquq normalarını bozıa, Kramatorsknıñ demiryol vokzalına raketa tüşürdi… İlk malümatqa köre, onlarnen insan elâk oldı ve yaralandı. Duşman ücüminiñ qurbanları ve zarar körgen infrastruktura aqqında malümat teşkerile», – dep bildirdi Baş prokurornıñ ofisi.
Donetsk vilâyeti arbiy memuriyetiniñ yolbaşçısı Pavel Kirilenko Ukraina telükesizlik hızmetiniñ eñ az 39 insan ölgenine dair malümatını tasdıqladı. Kirilenko malümatına köre, daa 87 insan yaralandı, büyük qısmınıñ alı ağır. Ukraina telükesizlik hızmeti elâk olğanlar arasında dört bala bar, dep haber etti.
Kramatorsktaki demiryol vokzalından Donbas sakinlerini Ukrainanıñ telükesiz vilâyetlerine alıp ketken tahliye trenleri teşkil etildi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
