2014 senesinde Qırımnıñ ilhaqında iştirak etken Rusiye arbiyleri aqqında malümat halqara mahkemelerde açılacaq davalarnı azırlamaq içün Ukraina Adliye nazirligine teslim etile. Bunı Qırım.Aqiqat Radiosı efirinde İnformNapalm halqara tahqiqat gruppasınıñ matbuat kâtibi Mihail Makaruk söyledi.
Matbuat kâtibi: «Biz Ukraina Adliye nazirligindeki başında İvan Lışçına turğan genç komanda ile çalışqanımızdan şeref duyamız. Ukrainanıñ Rusiyege qarşı şu qabaatlav aktlarını tertip etken kişi, tamam odır. Bütün bu faktlarnı biz işlep çıqa ve olarğa teslim etemiz, çünki olar onı işni bilgen insanlar ve mutehassıslar sıfatında uquqiy saağa keçireler», – dep qayd etti.
Makaruk, İnformNapalmnıñ ilhaqta iştirak etken Rusiye arbiylerniñ büyük qısmını tayin ete bilgenini ilâve etti.
Makaruk: «Al-azırda biz, istilâcılarnıñ Qırımğa kelgen yollarını, askeriy bölükleriniñ 70%-inden ziyadesini ve 2 biñden ziyade arbiylerniñ şahsiyetlerini tam olaraq tayin ettik. Suratsız kişiler adlar, soyadları, unvanlar ve rütbelerge saip olıp başlaylar ve olar bundan qorqa, çünki olar, zaman aşıması müddeti olmağan cinayetlerni işleyler», – dep yekün çekti.
Mevzuğa dair: «Dört taraftan kire ediler»: Rusiye arbiyeleri Qırımnı nasıl zapt ete ediler
Ağustos 21-de İnformNapalm halqara tahqiqat gruppası Qırımnıñ silâlı zapt etilmesinde iştirak etken Rusiye arbiyleriniñ yañı adlarını ilân etti. Bu yerde, tetqiqatta iddia etilgenine köre, «Qırımda, maskalar ve ayırıcı işaretleri olmağan uniformalar ile Ukraina arbiy qısımlarını zapt etken» Rusiye Qaradeñiz flotunıñ 810 nomeralı ayrı deñiz piyadeleri brigadasınıñ arbiyleri aqqında aytıla.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
