Daniya parlamenti ve ükümeti Ukrayinağa arbiy yardımnıñ büyük derecede artırılması mevzusında añlaşıp olğan. Bunıñ aqqında memleketniñ Mudafaa nazirligi haber etti.
Ukrayinağa arbiy yardım köstergen fond 2023 senesi 2,3 milliard kron ve 2025-2027 seneleri 23,5 milliard kron miqdarında qoşma para ayıracaq.
"Ukrayinadaki cenk ne qadar devam etecegini bilmeymiz, amma Rusiye ile küreşip olması içün yardımnı devam ettirmek kerek olğanını añlaymız. Cenk başlanğandan berli Daniya Ukrayinanı destekley ve ukrayinler bizim yardımımızğa işana bileceklerini köstere", - dep ayttı Mudafaa naziri Troels Lund Poulsen.
Episi olıp 2023-2028 seneleri devamında Daniya fondnıñ çerçivesinde Ukrayinağa arbiy yardım içün 60,4 milliard kron ayırdı.
Daniya 2023 senesi mart ayında Ukrayinağa arbiy ve arbiy olmağan yardım içün fond teşkil etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
