"Cebede vaziyet pek qıyın. 2022 senesi fevralniñ 24-nden berli o qolay olmadı, ve vaziyet qolay olğanını tüşüngenler cenkni añlamağan insanlardır", - dedi Danilov.
Amma, Ukrayina milliy telükesizlik ve mudafaa şurasınıñ kâtibiniñ aytqanına köre, Rusiyege İran ve Şimaliy Koreyadan silâ ketirilmesi cebe vaziyetinde "bazı deñişmelerge" yol açtı. Danilovnıñ qayd etkenine köre, böyle bir stsenariyde ''Ğarp Ukrayinağa silâ ve silâ yedekleriniñ berilmesini bayağı arttırmasa, vaziyet kerçekten de kerginleşecek''.
"Bizge silâ, silâ, silâ kerek", - dep ayttı SNBOU kâtibi. Danilov, ABD Kongressinde Ukrayinağa yardım berilmesiniñ keçiktirilmesinen bağlı vaziyetni de izaatladı. Onıñ aytqanına köre, "er bir keçiktirüv cebedeki vaziyetke tesir ete, amma Ukrayina Rusiye istilâsına qarşılıq köstermekten vazgeçmeycek".
''Bizden: toqtamaycaqmızmı, dep sorasalar? Biz toqtamaycaqmız, memleketimizni qoruycaqmız. Başqa çare yoq, başqa yol yoq. Ve biz pek ümüt etemiz ki, ortaqlarımız mustaqilligimiz em de bütün Ğarpnıñ imicini, itibarını ve birligini telükede olğanını añlarlar... Eminim ki, yaqın kelecekte Amerikanıñ destegi olacaq", - dep qoştı o.
Fevralniñ 1-nde Ukrayina baş naziri Denis Şmığal bildirdi ki, ükümet mudafaa-sanayı kompleksiniñ işi, yani satın aluv, silâ ve arbiy yedeklerniñ istisalı ve dronlarnıñ fiyatlandırılması aqqında üç qarar qabul etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
