Tanılmağan Dağlıq Qarabağ akimiyeti sentâbrniñ 20-nde saat 13.00-ten itibaren ateş toqtatılacaq, dep bildirdi. Malümatnı Azerbaycan Mudafaa nazirligi de tasdıqladı.
«Eki kün devamında Artsah Silâlı Quvetleriniñ bölükleri askerleri ve arbiy tehnikasınıñ sayısı bir qaç qat çoq olğan duşmandan qaraman mudafaasını qorup, oña biraz zarar ketirdi. Ne yazıq ki, Artsah tarafınıñ yaralanğanları ve ölüleri bar, bazı yerlerde duşman Mudafaa quvetleriniñ mevzilerine yetip, bir çoq yerni ve strategik yollarnı kontrol altına aldı», – dep aytıla haberde.
Uruş areketleri sentâbrniñ 20-nde saat 13.00-te yekünlenmek kerek edi.
Azerbaycan Mudafaa nazirligi bildirgenine köre, bu «Rusiye barışçı kontingenti vastasınen kelgen Qarabağnıñ ermeni sakinleriniñ muracaatından» soñ yapıldı.
Berilgen malümatqa köre, taraflar qalğan ermeni bölükleri ve arbiyleriniñ çıqışı, Dağlıq Qarabağnıñ silâlı birleşmeleriniñ bütünley silâsızlaştırıluvı ve «Dağlıq Qarabağdan ağır tehnika ve silânıñ yoq etilmesi içün çıqarıluvı» aqqında añlaştı. Bu talaplarını Azerbaycan aydınlatqan edi.
Sentâbrniñ 19-nda Azerbaycan ordusı Qarabağda «anayasa qurumını ğayrıdan tiklemek» maqsadınen arbiy operatsiya keçirecek, dep ilân etti. Ermeni ve Qarabağ ordularınıñ obyektlerine darbeler endirildi. Erivan Qarabağda arbiyleri olğanını inkâr ete.
Baqı operatsiyanı ilân etmezden evel Erivan ve Qarabağnı teraktlarnı teşkil etkeninde qabaatladı. Azerbaycan tarafınıñ malümatına köre, sentâbrniñ 19-nda eki maşina mayınlarğa rastkeldi. Altı insan elâk oldı, aralarında Azerbaycan İç işler nazirliginiñ dört hadimi bar edi.
Sentâbrniñ 19-nda kün devamında Azerbaycan arbiyleri Ermenistan Silâlı quvetleriniñ 60-tan çoq mevzisini kontrol altına alıp oldı, dep bildirdi Azerbaycan Mudafaa nazirliginiñ vekili. Çarşenbe künü saba müessise «yerli terror ile küreş tedbirleri muvafaqiyetnen devam ete», dep haber etti.
ABD, Rusiye ve Avropa Birligi zıddiyet taraflarını uruş areketlerini toqtatmalarına çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
