Aqyarda keçken künü sekiz yañı COVID-19 hastası qayd etildi. Bu aqta şeerniñ Rusiye ükümetiniñ matbuat hızmeti bildire.
«Bütün hastalar – yerli sakinlerdir, ekisi – pensioner. Altısı daa evel hastalanğanlarnen alâqada oldı. Qalğanlarınen bağlı epidemiologik tahqiqat keçirile», – dep aytıla haberde.
Akimiyetniñ malümatına köre, al-azırda 53 insan hastahanede buluna, 154 kişi yuqunç hastahanesinde közetile, №9 şeer hastahanesinde 126 insan buluna, 449 kişi yaşağan yerinde közetile.
«Umumen yılnıñ başından Aqyarda 399 insan yañı koronavirus yuqunçına oğradı. 323 kişi tüzeldi, 11 insan vefat etti», – dep aytıla haberde.
Keçken künü Qırımda 38 koronavirus hastası qayd etildi. Umumen, akimiyetniñ malümatına köre, Qırımda 1595 yañı koronavirus hastası qayd etildi. 82-si çetelden keldi, 112-si qomşu Rusiyeden kelgenler ve olarnen alâqada olğanlar. 1076 insan yahşı oldı. Aqyarda 386 insan koronavirus yuqunçına oğradı, 312 kişi tüzeldi, 11 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
