Qırımda dört aftadan berli bir künde qayd etilgen COVID-19 hastalarınıñ sayısında yañı rekord qayd etile – oktâbrniñ 26-nda saba 662 yañı hasta oldı, tünevinden daa çoq, dep haber ete Qırımnıñ Rusiye sağlıq nazirliginiñ matbuat hızmeti.
Müessise malümatına köre, keçken künü 17 insan koronavirus yuqunçından vefat etti, oktâbrniñ 25-nde 12 vefat aqqında haber etilgen edi.
«Umumen 93 314 COVID-19 hastası qayd etildi. Bir künde 707 insan yahşı oldı, bütün müddet devamında 78 775 kişi tüzeldi», – dep aytıla haberde.
Tünevin 655 yañı koronavirus hastası aqqında haber etildi.
Qırımda oktâbrniñ 25-nden itibaren koronavirus pandemiyası vaziyetiniñ daa beter olması sebebinden yañı sıñırlavlar çalışıp başladı. Bazarertesi künü QR-kod sisteması çalışacaq.
Oktâbrniñ 20-nde yarımadada koronavirus ile küreş tedbirleri quvetleştirildi. Qırımnıñ Rusiye yolbaşçısı Sergey Aksenov oktâbrniñ 30-ndan noyabrniñ 7-ne qadar raatlıq künlerini ilân etti. Bundan evel Qırımda koronavirus pandemiyası sebebinden ilân etilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları kirsetildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
