Ukraina TİN başı Dmıtro Kuleba "Re:Open Zakarpattia 2021. İnkişaf forumı" forumında çıqışta bulunıp, bir qaç memleket "Qırım platforması"na qoşulmaq aqqında qararnıñ qabul etilmesiniñ soñ basamağında olğanını bildirdi.
"Bir qaç memleket bar ki, "Qırım platforması"na qoşulmaq aqqında qararnıñ qabul etilmesiniñ soñ basamağındadırlar. Cografiyanı keñleştirmek içün Afrika qıtasınıñ ve Asiya memleketleriniñ qoşumalması ile faal çalışamız", - dedi Ku leba.
Ukraina Prezidentiniñ Qırım MC temsilciligi Kyivde "Qırım platforması" tesis sammitiniñ keçirilmesinden soñ Ukraina akimiyetiniñ faaliyetini "itibardan tüşürmek içün" sahte saifelerniñ yaratılmasında artmaqayd ete.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
