Rusiye mahkemesi tarafından 15 yıl apis cezasına mahküm etilgen qırımtatar Asan Yanikov Novoçerkask SİZO-sından Vladimirsk vilâyetindeki cezahanelerden birine etap etile.
Bunıñ aqqında "Qırım birdemligi" cemaat birleşmesi Asannıñ tatası Fatime Yanikovağa atfı etip bildre.
"Novoçerkask SİZO-sından avgustnıñ 26-nda çıqardılar ve Vladimirsk vilâyetindeki cezahanege etap etecek olalar", - dep bildirdi tatası.
Asan Yanikov – faal, apis etilmezden evel siyaisy mabüslerniñ davalarına qatnay edi. 2017 senesi narazılıq bildirip bir kişilik aktsiyağa çıqqan edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2023 senesi martnıñ 18-nde Rusiyeniñ Rostov-na-Donu mahkemesi «Qırım birdemliginiñ» beş faaline üküm çıqardı. Qırımtatar faalleri Akim Bekirov, Seytveli Seytabdiyev, Rustem Seythalilov 14 yılğa, Eskender Suleymanov ve Asan Yanikov 15 yılğa koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
