Daa bir Büyük Britaniya vatandaşı Rusiye tarafından destekdengen "DNR" qanunsız silâlı müfrezesiniñ boyevikleri tarafından esir etilgeneni kibi körüne.
BBC Rusiye haber vastalarınıñ yayınlağan videoda Büyük Britaniya vatandaşı Jon Hardingniñ ölüm cezası havfı olması aqqında bildire ve memleketniñ baş naziri Boris Johnsondan yardım istey.
Bu sahte intervyüni Rusiyeniñ Birinci kanalınıñ alıp barıcısı Marina Kim aldı. Hardinginiñ dostları ve yaqınları BBC-ge video yazısında onıñ olğanını tasdıqladılar. Berilgen malümatqa köre, o 50 yaştan büyüktir, 2018 senesi arbiy ekim kibi Ukrayina şarqına ketken. O mayıs ayında Mariupolde "Azov" polkunınh digen askerderi ile beraber esir etilgen. Büyük Britaniya TİN Hardingniñ bulunğan yeri aqqında haberdar olğanları ve onıñ tuvğanlarını ile temasta olğanlarını bildirdiler.
İyünniñ 9-nda "DNR" qanunsız silâlı müfrezesiniñ "Yuqarı mahkemesi" Ukrayina Silâlı Quvetleriniñ terkibinde cenkleşken ve esir etilgen üç ecnebiyni ölüm cezasına mahküm etti. Söz eki britaniyalı Şon Pinner ve Eyden Eslin, mağripli Saadun Bragim aqqındadır. Episi USQ añlaşmanı keniş mıqyaslı istilâ başlamazdan evel imzalağan edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
