Ermenistan Mudafaa nazirligi sentâbrniñ 28-nde saba bildirgenine köre, Dağlıq Qarabağda gece uruşlar devam etip, saba yañıdan başladı.
Müessise matbuat kâtibi Şuşan Stepanânnıñ Facebookta qayd etkenine köre, «saba duşman ücüm areketlerini yañıdan başlatıp», top, zırhlı tehnika ve qurşunatqıçlarnı qullandı, dep haber ete Azatlıq Radiosı.
Azerbaycan Mudafaa nazirligi bildirgenine köre, Ermenistan silâlı quvetleri saba Terter şeerine ateş açtı. Daa soñra nazirlik Azerbaycan ordusı «qarşı ücümni devam ettire» ve Talış köyü etrafındaki bir qaç bayırnı azat etti, dep qayd etti. Umumen «işğal etilgen yedi köy» ve bir qaç strategik töpe azat etildi, dep bildirildi.
Sentâbrniñ 27-nde eki taraftan da elâk olğanlar aqqında malümat bar edi, uruşlarnıñ ilk künü eñ az 23 asker ve adiy sakin elâk oldı, dep bildirilgen edi. Al-azırda yañı malümat yoq.
Öz-özüni ilân etken Dağlıq Qarabağnıñ arbiy memurlarınıñ bildirgenine köre, 18 insan (16 asker ve eki bala) elâk oldı ve 100-den çoq insan yaralandı.
Dağlıq Qarabağda sentâbrniñ 27-nde saba Azerbaycan ordusı ücüm etti.
Azerbaycan komandanlığı ateş açqanını «qarşı ücüm» dep adlandırdı ve Ermenistan quvetleri tarafından açılğan ateşke cevap berdi, dep bildirdi. Ermenistan lideri Nikol Paşinân Azerbaycannı ermeni halqına qarşı cenk başlatqanında qabaatlap, Erivan Dağlıq Qarabağdaki telükesizlik kefili ola, dep qayd etti.
AB, BM ve NATO Ermenistan ve Azerbaycannı ateşni toqtatmalarına ve zıddiyetniñ kerginleşmesini acele toqtatmasına çağırğanlar. Dağlıq Qarabağadki vaziyet meselesiniñ barışıq al etilmesinde aracı memleketler de (Azerbaycan, Ermenistan, Beyazrusiye, Almaniya, İtaliya, İsveçiya, Finlândiya ve Türkiye; gruppanıñ reisdeşleri Rusiye, Frenkistan ve ABD ola) buña çağırdı.
Ukraina Tış işler nazirligi Ermenistan ve Azerbaycan arasındaki zıddiyet kerginleşkeninde terenden qasevetlengenini bildirdi.
Dağlıq Qarabağ sebebinden Ermenistan ve Azerbaycan arasındaki zıddiyet 1988 senesi başladı. Ateş toqtatılmasına dair añlaşma tizilmesinden evel Baku Dağlıq Qarabağdaki ve memleketniñ bir qaç rayonındaki kontrolini coydı – halqara seviyede tanılğan topraqlarnıñ 20%-na qadar. Ateşkes rejimi 1994 senesi mayısta başladı. Buña baqmadan Ermenistan öz-özüni ilân etken Dağlıq Qarabağ cumhuriyetine arbiy yardım köstere, resmiy şekilde ne o, ne de dünyanıñ diger memleketi Dağlıq Qarabağnıñ mustaqilligini qabul etmey.
Azerbaycan öz-özüni ilân etken Dağlıq Qarabağ cumhuriyetini zıddiyet tarafı saymay ve muzakere keçirmege istemey.
Bu sefer zıddiyetniñ kerginleşmesi 2016 senesinden berli eñ büyük oldı.
