Martnıñ 23-nde saba tasdıqlanğan koronavirus hastalarınıñ sayısı 399 biñden çoq oldı. Bu aqta Johns Hopkins universiteti yanındaki Tedqiqatlar merkeziniñ malümatında aytıla, dep haber ete Azatlıq Radiosı.
COVID-19 hastalığından 14705 kişi öldi, 98799 insan tüzeldi.
Ukraina Sağlıq nazirliginiñ Cemaat sağlığı merkeziniñ malümatına köre, martnıñ 22-nde aqşam COVID-19 koronavirus hastalığına oğrağan 73 insan qayd etildi.
Martnıñ 22-nde berilgen malümatqa köre, Rusiyede koronavirusnen hastalanğanlarnıñ sayısı 61-ge artıp, 367 insan oldı, çoqusı Moskvada buluna.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
