Dünyada qayd etilgen COVID-19 koronavirus hastalarınıñ sayısı bir buçuq milliondan çoq oldı, dep haber ete Azatlıq Radiosı.
Hastalarnıñ sayısına köre ABD lider ola – aman-aman 430 biñ kişi. Soñki künde Amerika Birleşken Devletlerinde aman-aman 27 biñ insan koronavirus yuqunçına oğradı, 1800-den çoq kişi vefat etti. Qırğınlıq başlağanından berli aman-aman 14 biñ 700 hasta can berdi.
COVID-19 hastalarınıñ sayısına köre ekinci yerde İspaniya buluna. Anda virus 148 biñden çoq sakinde qayd etildi, aman-aman 15 biñ kişi vefat etti.
Üçünci yerde İtaliya buluna. Memlekette hastalanğanlarnıñ sayısı tahminen 140 biñ insan oldı. 17 buçuq biñ kişi vefat etti. İtaliyada COVID-19 hastalığından ölüm sayısı dünyada eñ yüksek ola.
Ğarbiy ekspertlerniñ tahminlerine köre, Pekin, yañı çeşit koronavirusı tarqalıp başlağan Qıtayda qayd etilgen COVID-19 hastalarınıñ kerçek sayısını ve vefat etkenlerniñ sayısını gizley.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
