Dünyada pandemiya başlağanından eki milliondan çoq insan koronavirus yuqunçından vefat etti. Bu aqta Johns Hopkins Universitetiniñ malümatına esaslanıp Azatlıq Radiosı haber ete.
Pandemiya başlağanından 90 milliondan çoq kişi COVID-19-ğa oğradı.
Eñ çoq vefat ABDde qayd etildi – aman-aman 390 biñ kişi. Ekinci yerde Braziliya – 207 biñden çoq insan. Üçünci yerde İndistan buluna. Anda 150 biñden çoq kişi vefat etti.
Rusiye hasta sayısına köre dördünci yerde buluna – aman-aman üç buçuq million kişi, vefat sayısına köre sekizinci yerde buluna. Resmiy malümatqa köre, pandemiya başlağanından memlekette aman-aman 64,5 biñ kişi vefat etti.
Rusiyeniñ koronavirus ile küreş operativ ştabınıñ resmiy statistikası Rosstat malümatından farqlıdır. Müessise, vefat etkenniñ koronavirus olğanını qayd ete, amma yuqunç ölüm sebebi olaraq tanılmay. Rusiyede keçken seneniñ mart ayından noyabr ayına qadar 116 biñ koronavirus hastası vefat etti, dep bildirdi Rosstat. 2020 senesiniñ dekabr ayınıñ statistikası daa yoq.
