Ukraina sağlıq nazirligi yañı koronavirusqa oğrav statistikasını yañarttı. Fevralniñ 29-na qadar dünyada COVID-19 virusınen hastalanğan 85 187 insan qayd etildi, 2924 kişi öldi.
«Avropada 27 memlekette (İtaliya – 888, Almaniya – 57, Frenkistan – 57, İspaniya – 32, Büyük Britaniya – 19, Hırvatistan – 5, Avstriya – 5, Rusiye – 2, Finlândiya – 2, İsveçiya – 11, İsrail – 5, İsviçre – 10, Yunanistan – 4, Gürcistan – 3, Norvegiya – 6, Romaniya – 3, Felemenk – 2, Estoniya, Şimaliy Makedoniya, Belçika, Azerbaycan, İslandiya, Litvaniya, San-Marino, Turkmenistan, Beyazrusiyede – birer kişi) COVID-19 yuqunçına oğrağan 1123 insan qayd etildi», – dep aytıla Sağlıq nazirliginiñ haberinde.
Ukraina nazirligi, 39545 insan tedaviylendi, dep bildirdi. Qayd etilgenine köre, Ukrainada yañı koronavirus hastaları qayd etilmedi.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
