Dünyada COVID-19 koronavirus yuqunçınen hastalanğanlarnıñ sayısı millionnı aştı. Qırğınlıq başlağanından berli ölgenlerniñ sayısı 50 biñ insannı aştı, dep bildire Azatlıq Radiosı.
Eñ çoq yañı virus hastası Amerika Birleşken Devletlerinde qayd etildi – 235 biñden çoq insan. Aman-aman 500 hasta vefat etti. Yuqunç tarqaluvına köre ekinci yerde İtaliya buluna – anda 115 biñden çoq hasta bar. Qırğınlıq başlağanından berli aman-aman 14 biñ insan vefat etti. Dünyada eñ büyük ölüm sayısı anda oldı. Soñki bir kün içinde İtaliyada 760 yañı ölüm qayd etildi. Üçünci yerde İspaniyada – 110 biñden çoq hasta ve 10 biñden çoq ölü, olardan 700-den çoq – yañı adiselerdir.
Almaniya hastalarnıñ sayısına köre Qıtaydan ögde oldı, bıltır dekabr ayında virus andan tarqalıp başladı. Al-azırda Almaniyada 84 biñden çoq hasta ve biñden çoq ölü bar. Qıtayda 81 biñden çoq COVID-19 hastası ve üç biñden çoq vefat qayd etildi. Pekin soñki aftaları hastalanğanlarnıñ sayısı eksilgenini bildire. Memlekette karantin tedbirleri yavaş-yavaş yımşatıla.
Soñki malümatqa köre, Rusiye işğal etken Qırımda 16 koronavirus hastası qayd etildi. 14-ü ketirildi, 4 kişi – yerli. Aqyarda 5 koronavirus hastası bar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
