Pandemiyağa qarşı tedbirler halqara teşkilâtlar ve dünya liderlerinden şahsiy sektor ile birleşmesini talap ete, dep bildirdi baş kâtip António Guterres koronavirusqa bağışlanğan video konferentsiyasında aprelniñ 24-nde. Dünyada hastalıq qurbanlarınıñ sayısı 200 biñ insannı aştı, dep haber ete Azatlıq Radiosı.
Video körüşüvinde Frenkistan prezidenti Emmanuel Macron, Almaniya kantsleri Angela Merkel ve Cenübiy Afrika prezidenti Cyril Ramaphosa iştirak ettiler.
Dünya sağlıq teşkilâtına para berilüvini toqtatqan ABD prezidenti Donald Trump ve pandemiya başlağan Qıtay lideri Si Tszinpin körüşüvge qoşulmadılar.
Dünya liderleri, hastalıq ile küreş çerçivesinde COVID-19 testleri, ilâc qıdırıluvı ve aşı meselesinde işini quvetleştirmege añlaştı.
Al-azırda ölüm sayısına köre birinci yerde ABD buluna, anda 55 biñ kişi vefat etti. Braziliya, Türkiye ve Cenübiy Afrikada tarqaluv başlana.
Aynı vaqıtta, ğarbiy memleketlerde yañı hastalarnıñ sayısı eksilip başladı. Avropanıñ ayrı memleketleri yañı hasta ve vefat etkenlerniñ sayısı eksilgeninen karantinni yavaş-yavaş lâğu etip başlay.
Dünya sağlıq teşkilâtı ise tenbiley: koronavirusqa oğrap tüzelgen insanlarnıñ tekrar hasta olmaycağını isbatlağan bir delil yoq.
Sağlıq memurları, karantinni lâğu etmege aşıqıp, koronavirusnıñ yañı tarqaluvına yol açmaq mümkün, dep tenbiley.
Johns Hopkins Universitetiniñ malümatına köre, COVID-19 hastalarınıñ sayısı 3 millionğa arttı, 750 biñ kişi tüzelip yahşı oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
