Johns Hopkins Universitetiniñ malümatına köre, aprelniñ 27-ne qadar dünyada COVID-19 hastalarınıñ sayısı üç millionğa yaqınlaştı (2971477), 865 biñden çoq insan tüzelip yahşı oldı, 206500 kişi vefat etti. Bir sıra memleket koronavirus yuqunçınıñ tarqaluvına yol bermemek içün kirsetilgen karantinni qolaylaştırıp başladı, dep haber ete Azatlıq Radiosı.
Bu qararnıñ tenqitçileri pandemiya büyükligine kerekli qadar qıymet kesilmegenini qayd ete, hastalıqnen bağlı kerçek malümat aydınlatılmay, testler yeterli sayıda yapılmay ve hastalıq alâmetsiz keçe bile.
Skeptikler, koronavirus bütün dünyağa tarqalğan Qıtay kerçek malümatnı aydınlatmay, dep tahmin ete – aprelniñ 27-nde ealisi 1,4 milliard insan olğan memlekette tek üç yañı hasta qayd etildi. Resmiy malümatqa köre, memlekette hastalarnıñ sayısı tahminen 83 biñ oldı, 4633 kişi vefat etti.
Vefat sayısı eksilip başlağan ğarbiy memleketlerde iqtisadiyat inkişafını ğayrıdan tiklemek içün karantin yavaş-yavaş yımşatıla.
ABDde – dünyada COVID-19-dan eñ çoq zarar körgen memlekette – aman-aman 1 million hasta qayd etildi ve 55 biñden çoq insan vefat etti. Memleketniñ daa bir ştat gruppası artqan işsizlik vaziyetinde koronavirusnen bağlı sıñırlavlarnı bu afta yımşatmağa azırlandı.
Aynı vaqıtta, virus dünya boyunca tarqalmağa devam ete, Braziliya, Rusiye, Türkiye, Cenübiy Afrika, Meksika «sıcaq noqtalarğa» çevirile.
İspaniyada bir çoq bala altı afta içinde ilk sefer aprelniñ 26-nda soqaqqa areket sıñırlavlarına oğramayıp çıqtı. Koronavirus sebebinden evde bulunuv nizamını mayısnıñ 4-nden başlap yavaş-yavaş yımşatmaq planları aqqında Belçika ilân etti. Avropada eñ çoq – 26000 kişi koronavirustan ölgen İtaliya da mayısnıñ 4-nden başlap sıñırlavlarnı yımşatacaq, amma akimiyet ileride de insanlar arasında mesafe olacaq ve maskalar taqılacaq, dep israr etti. İtaliya akimiyeti «strategik» olaraq müim iqtisadiy tedbirlerni bir afta içinde ğayrıdan tiklemesi mümkün, amma İtaliya mektepleri sentâbr ayına qadar çalışmaycaq.
Frenkistan akimiyeti büyük sayıda test yapıp, mayısnıñ 11-nden başlap karantinni zayıflaştırmağa azırlana.
Büyük Britaniya sıñırlavlarnı daa lâğu etmey, çünki hastahanelerde virustan ölgenlerniñ sayısı 20 biñni aştı. Bu raqam qartlar evinde vefat etkenlerni saymay, anda ise biñlernen kişi can berdi. Bu ay başında COVID-19 hastalığından tüzelgen Büyük Britaniya baş naziri Boris Johnson bugün işke qaytmalı.
Hastalanuv seviyesi eksilgen Almaniyada Volkswagen maşina şirketi beş aftadan soñ aprelniñ 27-nde işine başlaycaq, Mercedes-Benz ve BMW ise istisalnı tezleştirmek planları aqqında ilân ettiler.
Avropa tışında, Cenübiy Koreya tarafından testlerniñ faal qullanıluvı biznes işini blok etmeyip ya da yasaqlamayıp hastalıq tarqaluvına yol bermemege imkân bere. Memleket tek 10 yañı koronavirus hastası qayd etildi, dep bildirdi. Akimiyet, ükümet mekteplerni mayıs ortasında aça bile, dep tenbiledi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
