Dünyada COVID-19 adiseleriniñ rekord kün sayısını qayd ettiler. Bunı Dünya sağlıq teşkilâtınıñ (DST) saytındaki malümat köstere, bildire Azatlıq.Radiosı.
Bir künde dünyada 307930 yañı hastalıq adisesi qayd etildi.
DST-nıñ malümatına köre, dünyada pandemiya vaqtında umumen 28637952 adam hastalandı. 917 417 adam vefat etti.
COVID-19-nıñ bir milliondan çoq adisesi AQŞ-nda (qararnen 6,4 million kişi), İndistanda (tahminen 4,8 million kişi) ve Braziliyada (tahminen 4,3 million kişi) qayd etildi.
Bildirilgeni kibi, İsrail sentâbr 18-inde koronavirus adiseleriniñ artmaşından sebep kene şiddetli karantin tedbirlerini kirsetecek.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
