Martnıñ 26-sınıñ sabasına qadar dünyada koronavirusnen hastalanğan insanlarnıñ sayısı 471,5 biñ kişi oldı. Bu aqta Johns Hopkins universiteti yanındaki Tedqiqatlar merkeziniñ malümatında aytıla, dep haber ete Azatlıq Radiosı.
21 293 insan COVID-19 hastalığından öldi, 114 biñ tüzeldi.
Martnıñ 25-nde saat 22:30-da Ukrainada 145 COVID-19 hastası qayd etildi (vaqtınca işğal etilgen topraqlar sayılmay).
Ukrainada COVID-19 hastalığından ölgen 5 kişi qayd etildi. Bir hasta tüzeldi.
İşğal etilgen Qırımda yedi insannıñ koronavirusnen hastalanğanı tasdıqlandı. Martnıñ 25-nde 1,3 biñ insan közetüv altında buluna.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
