Aprelniñ 7-si sabasına qadar dünyada koronavirus yuqunçınıñ qurbanı aman-aman 75 biñ insan oldı, dep haber ete Azatlıq Radiosı.
Johns Hopkins universitetiniñ (ABD) malümatına köre, ölüm sayısına köre İtaliya (16 buçuq biñden çoq vefat), artından İspaniya (aman-aman 13 buçuq ölüm) kete, üçünci yerde ABD (10 biñden çoq vefat).
Aman-aman doquz biñ kişi Frenkistanda vefat etti, beş buçuq biñge yaqın insan Büyük Britaniyada can berdi.
Dünyada 1 million 348 biñ insannıñ koronavirus hastalığı qayd etildi. Eñ çoq hasta ABDde – 368 biñden çoq. İspaniyada – aman-aman 137 biñ hasta, İtaliyada – 132 biñden çoq, Almaniyada – 103 biñden çoq, Frenkistanda – aman-aman 99 biñ.
Dünyada 277 biñ 400-den çoq kişi COVID-19 hastalığından tüzeldi. Olarnıñ ekseriyeti Qıtayda – 77 biñden çoq, İspaniyada tüzelgenlerniñ sayısı 40 biñden çoq, Almaniyada – 28,7 biñ, İranda – 24 biñden çoq, İtaliyada – aman-aman 23 biñ.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
