Dünya Sağlıq Teşkilâtı yañı COVID-19 hastalarınıñ künlük sayısı rekord qoyğanını bildirdi. Bunı o iyün 21-inde haber etti, bildire Azatlıq Radiosı.
DST-nıñ malümatına köre, bir künde hastalarnıñ sayısı 183 020 adamğa arttı. BMT teşkilâtı qayd etkenine köre, birinci yerde Braziliya, anda 54 771 hastanı qayd ettiler, ekinci yerde - AQŞ (36 617 adise). İndistanda 15 400 adise tasdıqlandı.
Şimdigece ölümlerniñ eñ yüksek sayısı Şimaliy ve Cenübiy Amerikalarda qayd etildi - 219 000 adam. Avropada 193 000 adam vefat etti.
Umumen, John Hopkins Universitetiniñ malümatına köre, koronavirus pandemiyası 8,9 million hastalarda 466 000 adamnıñ ölümine sebep oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
