Dünya sağlıq teşkilâtınıñ yolbaşçısı Tedros Adhanom Ghebreyesus Avropa devletler arasındaki sıñırlarnı açmağa devam etkende, Qıtayda ise yañı hastalıq tarqaluvı sebebinden memleketniñ paytahtı Pekinde karantin kirsetilgende dünya memleketleri eñ büyük koronavirus telükesi «yañıdan başlana bilecegini bilmeli», dep tenbiledi, dep haber ete Azatlıq Radiosı.
Johns Hopkins Universitetiniñ soñki malümatına köre, dünyada hasta sayısı 8 mlndan çoq oldı, 436 biñ kişiden ziyade vefat etti. DST reberi qayd etkenine köre, virusnıñ şimdiki tarqaluv süratına kelmek içün eki ay yetti, künde 100 biñ hasta ola, bu em Asiya, em Amerikada qayd etile.
İyünniñ 16-ndan itibaren Qıtay Pekinde karantinni quvetleştirdi – 50 künden çoq Qıtay paytahtında bir hasta bile qayd etilmegen edi. Pekindeki 29 mesken kompleksi «qapalı idare» altına keçirildi, keçiş noqtaları qaravul altına alındı, bu komplekslerden çıqqan ya da anda kirgenler sert kontrol altına alındı.
ABDde soñki aftaları iqtisadiy faallik ğayrıdan başlatılğan 20 ştatta yañı hastalarnıñ rekord sayısı qayd etile. Yapılğan test sayısı da arta, amma sağlıq ekspertleriniñ aytqanına köre, telüke kene bar olğanını köstere.
ABDde tahminen 2,1 mln insan hastalandı, 116 biñ kişi vefat etti. Ükümet aydınlatqan yañı tahminge köre, oktâbr ayınıñ başında ABDde 200 biñden çoq vefat qayd etilmesi mümkün.
Braziliya hasta sayısına köre dünyada ekinci yerde buluna (888 biñden çoq), tahminen 44 biñ kişi vefat etti.
İndistan, Mısır ve Pakistan kibi dünyanıñ diger memleketlerinde vaziyet daa kritik ola.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
