Dünya sağlıq teşkilâtı Beyazrusiye akimiyetine muracaat etip, koronavirus qırğınlığınıñ yaramay vaziyetine azırlamasına çağırdı. Bu aqta Azatlıq Radiosı haber ete.
Dünya sağlıq teşkilâtı mütehassısları vaziyetni tedqiq etüv neticelerine köre Minskte jurnalistlernen körüşti. Beyazrusiyede qırğınlıq daa telükeli fazağa keçti, dep bildirdi gruppa reberi Patrik O'Konnor.
O, Beyazrusiye akimiyetine fevqulâde areketler planını ve hastahanelerni azırlamasını tevsiye etti. DST vekilleri bütün kütleviy tedbirlerni, hususan mayıs 9 arbiy paradını lâğu etmege tevsiye etti.
Beyazrusiye mudafaa nazirligi cumaertesi künü ilân etkenine köre, paradnı başqa vaqıtqa qaldıruv ihtimali bile «muzakere etilmey».
Beyazrusiye sağlıq naziri DST ekspertleriniñ matbuat konferentsiyasından soñ ve olarnıñ tevsiyelerine baqmadan, Beyazrusiyede keniş karantin tedbirleri ilân etilmemeli, dep ayttı. Vladimir Karanikniñ bildirgenine köre, «sıñırlav tedbirleri hastalıqnı yoq etip olamaz».
Aprelniñ başından berli Beyazrusiyede, resmiy malümatqa köre, hastalarnıñ sayısı 10 qat arttı. 2226 insannıñ diagnozı tasdıqlandı. Olardan bir qaç yüz insan tibbiyet hadimidir. 20 kişiden çoq vefat etti.
Prezident Aleksandr Lukaşenko cumaertesi künü Minskte Dünya sağlıq teşkilâtınıñ mütehassısları taqdim etken hulâsalarnı şimdilik izaatlamadı.
