Dünya sağlıq teşkilâtı (DST) koronavirus yuqunçınıñ peyda oluv farzlarınıñ episini aktual saya. Bu aqta teşkilât yolbaşçısı Tedros Ghebreyesus bildirdi, dep yaza Azatlıq Radiosı.
«Bazı gipotezalar red etilgenine bağlı sualler peyda oldı. Bütün versiyalar ileride talil ve tedqiq içün açıq qalğanını tasdıqlamağa isteyim», – dedi Ghebreyesus Qıtayğa yollanılğan DST mütehassıslarınen keçirilgen subetlerge esaslanıp.
Bu afta Qıtayda DST yolbaşçılığındaki missiya virusnıñ laboratoriyada peyda oluv tahminlerini az ihtimalli sayıp, bir daa baqmaycaq, dep bildirdi. Mütehassıslar esas gipotezalar virusnıñ yelqanatlardan peyda olğanını ve başqa ayvanlardan insanğa keçkenini bağlay, dep ayta.
«Bu missiya bütün cevaplarnı tapmaycağını aytqan edik, amma o, COVID-19 sebebi olğan koronavirusnı añlamamızğa yaqın olmamız içün müim malümat qoşacaq», – dep qayd etti Ghebreyesus.
Amerika Birleşken Devletleri DST mütehassısları bergen hulâsalarnı tedqiq etecek, dep bildirdi.
Prezident Donald Trumpnıñ sabıq Amerika memuriyeti yañı koronavirus Qıtaynıñ Uhan şeerindeki laboratoriyadan tarqalması mümkün edi, dep bildirgen edi. Qıtay Halq Cumhuriyetiniñ akimiyeti bunı inkâr etip, Uhan virusologiya institutı soy viruslarnı tedqiq etmey, dep qayd etken edi.
