Dört künde dünyada bir million adamda COVID-19 tasdıqlandı. Bunı John Hopkins universitetiniñ sistema tetqiqatı merkeziniñ saytında derc etilgen malümat köstere.
Sentâbr 11-iniñ sabasına bütün dünyada hastalanğanlarnıñ sayısı 28 million adamğa keldi.
Koronavirustan sebep müşkülleşken hastalıqlardan 908 017 adam vefat etti, 18 899 770 adam yahşı oldı. COVID-19-nıñ ekseriyeti AQŞ-ta (qararnen 6,4 million), İndistanda (tahminen 4,47 million) ve Braziliyada (qararnen 4,24 million) qayd etildi. Dünyada 27 milliondan hasta olğanı sentâbr 1-inde belli oldı.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
