Qırımnıñ Rusiye Fevqulâde vaziyetler nazirliginde furtuna ihtarı ilân etildi. Yaramay ava hususan Aqmescitte tahmin etile.
«İyünniñ 20-nde üyleden soñ Aqmescitte küçlü sağanaq, boranlı yağmur, iri burçaq yağması, saniyede 20-25 metr yel esmesi beklenile», – dep tenbiley müessise, yerli Gidromettsentr malümatına esaslanıp.
Müessise malümatına köre, bu vaziyette elektrik naqil hatları ve bağ hatlarınıñ bozuluvı, yahşı qoyulmağan, büyük reklama levhalarınıñ zarar körmesinen bağlı fevqulâde vaziyet ihtimali büyük.
Şeer sakinlerinden yaramay ava vaqtında evde qalmalarını rica eteler.
Qırımda iyünniñ 20-nde ve 21-nde yaramay ava olacağını tahmin eteler.
Bu afta Kezlevde furtunalı ava neticesinde esli-başlı qadın öz evindle blok etildi.
Çarşenbe künü, iyünniñ 16-nda, Aqmescitte boranlı sağanaq yağdı, şeerniñ bir qısmını suv bastı. Aqyarda iyünniñ 18-nde kün ortasında küçlü sağanaq yağdı.
Kanalizatsiya dayanamadı, suv aqımları ise deñizge kete edi, çamur cayav yolaqlarını qapattı.
