Qırımnıñ Qapsihor (Morskoye) köyünde Rusiye uquq qoruyıcıları qırımtatar milliy areketiniñ veteranı Rustem Useinov oturğan vagonçıqnı sarıp aldı, dep haber ete Milliy Meclis reisi Refat Çubarov.
Onıñ aytqanına köre, vagonçıq turğan yerde Useinov ev qurğan edi, amma 2021 senesi noyabr ayında Rusiye akimiyeti onı yıqtı.
«Lâkin Rustem ağa aqlarını qorup, qanunsız şekilde yıqılğan evi yerinde vagonçıq qoyup, anda yaşay edi… 2025 senesi martnıñ 10-ndan sabasından başlap Qapsihor (Morskoye) köyüniñ yalısına Rusiye işğalcileri ketirgen tehnika ve silâlı insanlarnıñ sayısına köre, vagonçığı da yıqılacaq», – dedi Çubarov.
Rusiye akimiyeti bu malümatnı izaatlamadı.
2021 senesi Qapsihor köyünde (Sudaq) Rusiye akimiyeti qırımtatar milliy areketiniñ veteranı Rustem Useinov mahkeme qararına itiraz bildirse de, onıñ evini yıqtı. Adam evi yıqılğanda yaramadı, qan basımı artqanı içün onı acele yardım ekimleri alıp ketti. Soñra Rusiye mahkemesi Useinovdan evi yıqılğanda masraf etilgen paranı talap etti.
Ukrayina Tış işler nazirligi ev yıqıluvını takbih etti. Ukrayina prezidentiniñ Qırım Muhtar Cumhuriyetindeki temsilciligi Qırımda insanlarğa qarşı «repressiyalarnı toqtatmağa» çağırdı. Useinovnıñ jurnalistlerge bildirgenine köre, Qapsihornı terk etmeycek ve «tuvğan toprağında yaşamaq aqqı oğrunda küreşmege» devam etecek.
