Qırımtatar Milliy Meclisiniñ reisi Refat Çubarov Rusiye prezidentiniñ saylavları arfesinde qırımlılarğa muracaat etti.
Onıñ qayd etkenine köre, Rusiye akimiyeti işğal etilgen topraqlarda yaşağan Ukrayına vatandaşlarını «qanunsız» ve «cinaiy» rey berüvge zorlay.
Şu sebepten Çubarov rey bermemege tırışmağa çağırdı – «evde, elektron rejimde ya da saylav noqtalarında».
«Rusiye işğalcileri yapqan cinayetine sizni de celp etme içün ğayret köstere. İşğalci memleketniñ işğal etilgen topraqta keçirgen saylavları qanunsız ola, halqara uquq normalarına zıt kele. Rus işğalcilerine yaşağan yeriñizde yapqan cinayetlerine sizni de celp etmege imkân bermeñiz. Unutmañız, varvar qanunlarına köre bile bu saylav bölüklerine kelmemeñiz mümkün», – dedi Çubarov.
Meclis reisi saylav komissiyalarınıñ erkânına kirgen insanlarğa da muracaat etti. «Bu komissiyalarnı terk etmeseñiz, areketleriñiz Ukrayınağa qarşı cinayet olaraq tasnif etilecek», – dep qayd etti Çubarov.
Rusiye prezidentiniñ saylavları 2024 senesi martnıñ 15-17-nde keçecek. Rusiye anayasasına kirsetilgen deñişmeler sebebinden Putin beşinci (ve atta altıncı) kere prezident ola bile. İlk sefer 2000 senesi bu vazifege keldi.
Qırım yarımadası bir qısmı olğan Ukrayına ve çoqusı memleket ve halqara teşkilât, hususan BM ve OSCE, Rusiye işğal etken Ukrayına topraqlarında (2014 senesinden başlap keçirilgen) Rusiye saylavlarını tanımay ve takbih ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
