Bu aqta Azatlıq Radiosınıñ yayınında (Svoboda.Ranok leyhası) Qırımtatar Milliy Meclisiniñ reisi Refat Çubarov ayttı.
«Köremiz ki, Rusiye işğalci ordusı içün büyük zarar ketirgen darbelerden soñ qırımtatarlarnıñ evlerinde tintüvler keçirildi, insanlar tutuldı. Bıltır Saqqa yaqın Novofedorovka uçaq alanında arbiy uçaqlar yoq etilgen soñ böyle oldı. Bir künden soñ Canköy rayonında silâ anbarı yoq etildi, Canköy rayonında qırımtatarlarnıñ evlerinde kütleviy tintüvler keçirildi. Altı insan apiske alınğan edi», – dep tarif etti o.
Aqyarda Rusiye Federatsiyasınıñ Qara deñiz flotunıñ ştabına ücüm etilgen soñ işğalciler Ukrayına mahsus hızmetlerine yardım etkenlerni qıdırdı.
«Aqyarda Rusiye Qara deñiz flotunıñ ştabı patlatılğan soñ Ukrayına mahsus hızmetlerini bu obyektke ketirgenlerni qıdırıp, kene qırımtatarlarnıñ evlerine kelgenler. Aqmescit-Bağçasaray demiryolu patlatılğanda da böyle edi. Yani er bir arbiy akt ya da arbiy obyektniñ yoq etilüvi – vatandaş ealisine tesir ete. Amma insanlar bunı añlay, çünki Rusiye işğalcileri cemaatnı kontrol altında tutmağa tırışa, repressiyalarnı quvetleştirmek içün daa bir usul», – dep qayd etti Çubarov.
2023 senesi avgust ayında Ukrayına prezidentiniñ Qırım temsilciligi yarımadada qanunsız tutulğan 180 sakin aqqında bildirdi. 117-si qırımtatarı edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
