Rusiye Federatsiyası tarafından mahküm etilgen qırımlılarnıñ Rusiye apishanelerine avuştırıluvı – faal ve soy-soplarına qarşı intiqam şeklidir, dep ayttı Qırımtatar Milliy Meclisiniñ reisi Refat Çubarov Azatlıq Radiosı (Svoboda.Ranok leyhası) yayınında.
«Rusiye işğalci akimiyetiniñ yapqanları bu. Ükümler işke tüşürilgende Qırımda mahküm etilgen bütün siyasiy mabüsler Rusiyege alıp ketirile, apishanelerge qapatıla ve Qırımdan uzaqlaştırıla. Bu daa bir intiqam, ceza şeklidir», – dep qayd etti o.
«Ebet, Mında tuvğanlarınen bağlar üzüle. Soy-sop içün de bir işkence ola, çünki apiste yatqanlarnı ziyaret etip olamaylar», – dep qoştı Çubarov.
Meclis reisi qayd etkenine köre, bugünki künde Rusiyede Ukrayına diplomatik temsilcilikleriniñ faaliyeti toqtatıla, şunıñ içün advokatlar ve diplomatlar Rusiyede bulunğan ukrayınalılarnı körip olamay.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
