Qırımtatar Milliy Meclisiniñ reisi Refat Çubarov Rusiye Federatsiyası Devlet dumasına berilgen Sovet Sotsialistik Cumhuriyetler Birligi Yuqarı şurasınıñ Qırımnı Ukrayına Sovet Sotsialistik Cumhuriyeti erkânına qoşuv qararını «keçersiz» tanuv qanun leyhasını izaatladı.
Cevap olaraq Çubarov Ukrayına Yuqarı Radasında Türk Milletine muracaat etip, 1700 senesi İstanbul añlaşmasınıñ VIII maddesini sıfırlamağa çağırmağa teklif ete.
Türkiye ve Rus çarlığı arasında tizilgen vesiqağa köre, Moskva Qırım hanına er yıl ödegen tölevden azat etildi.
Çubarovnıñ fikirince, Qırımtatar Milliy Meclisi ve Ukrayına Maliye nazirligi 1700 senesinden 1991 senesine qadar ve 2014 senesinden başlap yarımadanıñ işğalden azat etilgenine qadar Rusiye ödemegen vergilerni sayıp ükümetke tanıtmalı.
«Ukrayına Nazirler şurası Rusiye ödemegen vergilerni tasdıqlamalı... ve Rusiye arbiy istilâsı vaqtında Ukrayınağa ketirgen zarar içün tazminat ödegende Qırım Muhtar Cumhuriyeti bücetine berilmesini temin etmeli», – dep añlattı ğayesini Çubarov.
Martnıñ 11-nde Rusiye Devlet dumasına Sovet Sotsialistik Cumhuriyetler Birligi Yuqarı şurasınıñ Qırımnı Ukrayına Sovet Sotsialistik Cumhuriyeti erkânına qoşuv qararını «keçersiz» tanuv qanun leyhası berildi. «RİA Novosti» Rusiye agentligi bildirgenine köre, bu qanun leyhasınıñ müellifleri deputat Konstantin Zatulin ve qırımlı Rusiye senatorı Sergey Tsekov ola.
1954 senesi fevral ayında SSCB Yuqarı Şurası «Qırım vilâyetini Rusiye SFSR erkânından USSC erkânına keçirüv» buyruğını çıqardı. O vaqıttan berli ve 2014 senesi Rusiye işğaline qadar yarımada Ukrayına erkânında edi.
Mustaqil Rusiye ve Ukrayına vaqtında memleketler arasında Qırımnı Ukrayına olaraq pekitken dört yüzden çoq çeşit vesiqa tizilgen edi.
Halqara toplulıq Qırımnıñ Rusiye ilhaqını tanımadı ve Rusiyege qarşı sanktsiyalar kirsetti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
