Qırımtatar Milliy Meclisiniñ reisi Refat Çubarov Freedom telekanalınıñ yayınında BM Halqara mahkemesiniñ Ukrayınanıñ Rusiyege qarşı davalarındaki qararlarnı izaatlap, Rusiye Qırımda Qırımtatar Milliy Meclisiniñ yasağını lâğu etmek «BM mahkemesiniñ qararını cezasız yerine ketirmey», dep ayttı.
«2017 senesi aprel ayında BM Halqara mahkemesi vaqtınca işğal etilgen Qırımda Rusiyeniñ Qırımtatar Milliy Meclisiniñ yasağını lâğu etüv qararını qabul etti. Rusiye bu qararnı yerine ketirmedi. Meclis faaliyetiniñ yasağını lâğu etmedi», – dedi Çubarov.
Çubarov BM Halqara mahkemesiniñ Irqiy ayırım şekilleriniñ yoq etilüvine dair halqara şartnamesiniñ bozuluvı aqqında davasında çıqarğan qararından közü qayttı, dep bildirdi.
«Halqara mahkemeniñ qararından közüm qayttı, çünki mahkemeniñ qararına köre, Qırımnı işğal etken Rusiye qırımtatarlarnı, etnik ukrayınlerni insanlar millet mensüpligine köre degil, Qırımnı zapt etken Rusiyege qarşı ayrı bir siyasiy baqışları olğanından taqip ete. Mahkeme Qırımdaki repressiyalarnıñ siyasiy sebepleri bar, dep qarar çıqardı. Bu da büyük peşmanlıq», – dep qayd etti Meclis reisi.
Ukrayına 2022 senesi fevralniñ 26-nda BM Halqara mahkemesinde dava açtırıp, Rusiye büyük istilâsını aqlamaq içün Genotsidke yol bermeme halqara şartnamesini boza, dep şikâyet etti: Rusiye prezidenti Vladimir Putin «mahsus arbiy operatsiya» aqqında ilân etip, Ukrayına şarqında genotsidni toqtatacaq ola, dep bildirgen edi.
BM Halqara mahkemesi Rusiye BM terrorizmni maliye etüvge yol bermeme şartnamesiniñ bazı bölüklerini bozğanını tanıdı, çünki Rusiye 2014 senesi Ukrayına şarqında silâlı gruppirovkalarnıñ maliye etilüvi tahqiq etmedi. Buña baqmadan, mahkeme Kyiv talap etkeni kibi, tazminat belgilemedi.
Ukrayına iddialarından biri de Qırımnıñ Rusiye tarafından işğal etilüvinden soñ qırımtatarlar ve ukrayınlerniñ basqığa oğraması oldı. Mında da talaplarnıñ bir qısmı qabul etilmedi, amma Rusiye Irqiy ayırım şekilleriniñ yoq etilüvine dair şartnameniñ bozucısı olaraq tanıldı. Hususan Qırımtatar Milliy Meclisini yasaq etkeni ve işğal altındaki Qırımda ukrayınlerniñ ana tilinde tasil aluv aqlarını bozğanı içün.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
