Rusiye Federal telükesizlik hızmeti martnıñ 22-nde «Crocus City Hallda» terakt davası boyunca daa üç insan tutulğanını bildirdi, dep haber ete Azatlıq Radiosınıñ Rus hızmeti.
Moskva, Yekaterinburg ve Omskta tutulğanlar bar, dep haber etile. Eki erkek ücüm iştirakçilerine silâ ve maşina almaları içün para yollağanlarından şübhelene. Üçünci insan vastacılarnı celp etkeninde ve icracılarnı maliye etkeninde qabaatlana.
Tutulğanlar Orta Asiyalı dep qayd etile. Biriniñ Rusiye vatandaşlığı bar.
Al-azırda terakt davasınıñ on mabüsi apiste buluna. Rusiye polisi 11 insannı tuttı.
Martnıñ 22-nde aqşam kamuflâjlı urbada bir qaç insan kontsert salonında avtomatlardan ateş açıp, binanı ateşke berdi. Soñki malümatqa köre, ücüm neticesinde 144 insan elâk oldı.
Martnıñ 23-nde Rusiye Tahqiqat komiteti bildirgenine köre, «Ukrayına sıñırından uzaq olmağan Brânsk vilâyetindeki mahsus hızmetler ve uquq qoruyıcı organlar «Crocus City Hall» kontsert salonında terakt yapqan dört şübhelini tuttı.
FSB, terror ücüminde iştirak etken şahıslar «Rusiye-Ukrayına sıñırından» keçecek edi, «Ukrayına tarafında bağları bar edi», dep bildirdi. Bu versiyağa Rusiye prezidenti Vladimir Putin de qoltuttı.
Tış işler nazirligi Rusiye resmiy şahıslarınıñ Ukrayınanıñ «bağları» qabaatlavlarını red ete.
Crocus City Halldaki ücüm qurbanlarnıñ sayısına köre Rusiye tarihında eñ büyük teraktlardan biri ola, daa çoq qurban tek 2004 senesi Beslanda mektepke qarşı ücüm vaqtında olğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
