Ukrayına istihbaratı Moskva civarındaki «Crocus City Hall» alış-veriş merkezinde atışnı izaatladı.
«Putinniñ mahsus hızmetleri yapqan provokatsiya, halqara toplulıq tenbilegen edi. Kreml zalımı karyerasına böyle başladı ve vatandaşlarına qarşı böyle cinayetlernen onı bitirecek ola», – dep bildire «Ukrayınska Pravda» Ukrayına Mudafaa nazirligi Baş istihbarat idaresiniñ vekili Andriy Yusovnıñ aytqanlarını.
Ukrayına prezidenti ofisiniñ yolbaşçı mesleatçısı Mıhaylo Podolâk bildirgenine köre, Ukrayınanıñ «Crocus City Halldaki» atışqa bir alâqası yoq.
Atış «Piknik» gruppasınıñ kontserti başlamazdan kontsert zalınıñ hollında başlandı, Telegram kanallarında tarqatılğan videolarda insanlarğa ateş açqan bir qaç silâlı adamnı körmek mümkün.
Soñra ateş yüzlernen insan bulunğan salonda eşitildi. Şaatlar bir qaç patlav aqqında bildire, neticede binada yanğın çıqtı, dam yıqıldı.
Martnıñ 7-nde aqşam ABD elçihanesi Moskvada yaqın eki künde terakt telükesi bar, dep tenbiledi. Büyük Britaniyanıñ Tış işler nazirligi ve ABD Devlet departamentiniñ konsullıq bürosı telüke aqqında bildirdi. Bundan ğayrı, Washingtondaki Tış işler nazirligi Rusiyege ziyaret telükesiniñ seviyesini eñ yüksekke çıqardı.
Rusiye kütleviy haber vastaları atış, patlavlar ve yanğın neticesinde eñ az 40 insan elâk oldı, daa tahminen 100 insan yaralandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
