Avstraliyanıñ paytahtı Kanberrada fevralniñ 23-nde avstraliyalı ukrainler ve yerli sakinler Qırım işğaliniñ altıncı yılı munasebetinen Rusiye elçihanesi ögünde aktsiya keçirdi.
Ellige yaqın insan elçihane kirişinde «Qırım – Ukrainadır! Qırımnı azat etiñiz!» (Crimea is Ukraine! Liberate Crimea!) yazuvlı şiarlarınen turdı.
Aktsiya koordinatorı Natalya Alehinanıñ Azatlıq Radiosına bildirgenine köre, tedbirniñ maqsadı «cemaatçılıqnıñ diqqatını Rusiyeniñ Ukrainadaki istilâsına celp etmek ve avstraliyalılarğa Kremlniñ geopolitik cinayeti – Qırım işğali aqqında hatırlatmaq edi».
Aktsiya iştirakçileri, 76 yıl evelsi çeçen ve inguş halqları sürgün etilgen edi, dep hatırlattı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
