Jurnalistlerni qoruma komiteti (CPJ) Rusiye akimiyetini iyülniñ 27-nde Rusiye nezareti altındaki Qırım Yuqarı mahkemesiniñ binası ögünde Rusiye quvetçileri tarafından tutulğan vatandaş jurnalisti Kulamet İbraimovnı azat etmege, Lutfiye Zudiyevağa berilgen cöremini lâğu etmege çağırdı.
"Ukrayinanıñ işğal etilgen Qırım yarımadasındaki Rusiye akimiyeti bu bölgede insan aqlarınıñ telâşlı vaziyetini aydınlatmağa tırışqan jurnalitslerni taqip etmege devam ete. Olarnıñ reportajları cemiyet içün pek meraqlı ve müidir ve olarnıñ işine manialar yaratmamaq kerek. Olar Kulamet İbraimovnı deral vazat etmeli, Lutfiye Zudiyevanıñ cöremesini lâğu etmeli ve jurnalistlerniñ işine mania olmamalı", - dep yazıla bildirmede.
Haber etilgen kibi, CPJ bu vaziyetke dair izaat almaq içün Qırım boyunca Rusiye İç işler nazirligine muracaat etken, amma anda cevap bermegenler. Bundan ğayrı komitet Aqmescitteki Jeleznodorojnıy rayon mahkemesine elektron şeklinde beyanat yollağan, andan da cevap kelmegen.
Berilgen malümatqa köre, iyülniñ 27-nde mahkeme binası ögünde şikâyet arizası baqılğan Nariman Celâl ve ağa-qardaş Asan ve Aziz Ahtemovlarnıñ tarafdarları toplaştı. Davalarında şikâyet arizası baqılacaq. Aq qorçalayıcılarnıñ malümatına köre, saat 10:30-da 13 insan tutuldı – 10 erkek ve üç qadın.
Berilgen malümatqa köre, Rusiye kontrolindeki Qırım Yuqarı mahkemesiniñ binası ögünde tutulğanlar arasında qırımlı aq qorçalayıcı Lutfiye Zudiyeva, siyasiy mabüs Aziz Ahtemovnıñ anası Zarema Ahtemova, «Qırım birdemliginiñ» mühbiri Kulamet İbraimov ve siyasiy mabüs Nariman Celâlnıñ qardaşı Ruslan Celâlov bar.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
