Qırımnıñ Rusiye sağlıq nazirligi malümatına köre, keçken künü 16 insan koronavirus yuqunçından vefat etti, bir kün evelsi vefat etkenlerniñ sayısı bir kişi az edi.
Bunıñnen beraber Qırımda keçken künü 263 yañı COVID-19 hastası qayd etildi, bir kün evelsi 7 hasta az qayd etildi, dep bildire Qırımnıñ Rusiye yolbaşçısı Sergey Aksenov içtimaiy ağlardaki saifelerinde.
«199 hasta tibbiy yardım içün muracaat etkende qayd etildi, 64 kişi daa evel qayd etilgen hastalarnen alâqada oldı. Bir künde 375 insan tüzeldi, bütün müddet devamında 61 260 kişi yahşı oldı», – dep yazdı Aksenov.
Çarşenbe künü 270 yañı COVID-19 hastası ve koronavirustan vefat etken 15 insan aqqında haber etildi.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya avgustnıñ 11-nde COVID-19-dan vefat etkenlerniñ sayısı rekord oldı, dep bildirgen edi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
